Гала-канцэрт і… гала-выстаўка

Учора ў галерэі "Універсітэт культуры" адкрылася Рэспубліканская мастацкая выстаўка "Таленты Беларусі". Як паведаміла карэспандэнту "К" Вольга Масалава, намеснік начальніка аддзела падтрымкі і развіцця культурна-адукацыйных ініцыятыў Беларускага дзяржаўнага ўніверсітэта культуры і мастацтваў, які займаецца арганізацыяй мерапрыемстваў, шмат творцаў прыехалі ў сталіцу з усіх рэгіёнаў краіны. Вельмі цікавыя работы прадставілі навучэнкі дзіцячай школы мастацтваў з Крычава Вольга Краўцова, Вікторыя Голікава і Таццяна Сасунова. У экспазіцыі можна пабачыць жывапіс, графіку, скульптуру, дэкаратыўна-прыкладное мастацтва і фота юных аўтараў з Ліды, Нясвіжа, Баранавічаў, Брэста ды іншых гарадоў.

Пейзажы, нацюрморты, сучасны погляд на жыццё ў горадзе і сельскай мясцовасці, сваё стаўленне да ўсяго, што адбываецца, паказалі студэнты сярэдніх спецыяльных навучальных устаноў, Акадэміі мастацтваў, а таксама ўжо даволі вядомыя мастакі: Алеся Скарабагатая, Аляксандр Зінкевіч, Кацярына Сумарава, пераможца Рэспубліканскага конкурсу "Зорка ўзышла над Беларуссю" Дзяніс Іваноў ды многія іншыя. Усяго - больш за сорак творцаў, якія былі адзначаны фондам за 15 гадоў яго існавання.

Музычнае мастацтва прадэманструюць на Гала-канцэрце ў Белдзяржфілармоніі лаўрэаты, стыпендыяты і дыпламанты спецыяльнага фонду 18 снежня. Па словах Вольгі Масалавай, акцэнт тут будзе зроблены на народнай музыцы. Выступіць і Дзяржаўны акадэмічны сімфанічны аркестр Рэспублікі Беларусь пад кіраўніцтвам Аляксандра Анісімава. Як адзначыла дырэктар аркестра Ірына Арцімовіч, у яго склад уваходзяць сёння маладыя музыканты, адзначаныя фондам: скрыпач Павел Нятук і піяністка Улада Беражная. Яны прымуць актыўны ўдзел у канцэрце.

А 22 снежня ў Нацыянальным акадэмічным Вялікім тэатры оперы і балета можна будзе пабачыць балет, пачуць класічную музыку і вакальнае майстэрства лаўрэатаў і стыпендыятаў спецфонду Кіраўніка дзяржавы. Гэта навучэнцы і выпускнікі Рэспубліканскай гімназіі-каледжа пры Беларускай дзяржаўнай акадэміі музыкі, студэнты самой Акадэміі. Сярод удзельнікаў - Аксана Волкава, Юрый Гарадзецкі, Ілля Сільчукоў ды іншыя.

Штотыднёвая грамадска-асветнiцкая газета "Культура".
2010-12-11

Рэспубліканская выстаўка работ лаўрэатаў, дыпламантаў і стыпендыятаў спецыяльнага фонду Прэзідэнта Рэспублікі Беларусь

У мастацкай галерэі "Універсітэт культуры" 10 снежня ў 17.00 адкрыецца Рэспубліканская выстаўка работ лаўрэатаў, дыпламантаў і стыпендыятаў спецыяльнага фонду Прэзідэнта Рэспублікі Беларусь па падтрымцы таленавітай моладзі, прысвечаная 15-годдзю дзейнасці фонду. 41 малады аўтар прэзентуе наведвальнікам галерэі творы жывапісу, графікі, скульптуры, дэкаратыўна-прыкладнога мастацтва, мастацкай фатаграфіі.

Распавядае Міхаіл Баразна, старшыня экспертна-мастацкай камісіі спецыяльнага фонду Прэзідэнта Рэспублікі Беларусь па падтрымцы таленавітай моладзі - "Навучыць гледача суперажываць, думаць, быць адказным – высакародная задача мастацтва ва ўсе часы. Самыя ўзнёслыя ідэалы прыгожага адлюстроўваюцца ў таленавітых творах. Удзельнікі рэспубліканскай выстаўкі ўжо маюць першыя поспехі. Увазе гледача прадстаўлены таленавітыя творы, створаныя ў рознай творчай манеры, – ці  лірычны пейзаж, нацюрморт, ці жанравая сцэнка. Уся экспазіцыя пацвярджае, што навакольны свет сучасніка – магутная, жыватворная крыніца натхнення мастака. Гэтае жыццё знайшло сваё адлюстраванне ў мастацкіх работах  Аляксандра Зінкевіча, Піліпа Басалыгі, Кацярыны Сумаравай і іншых. Пашыраецца панарама прадстаўленых твораў. Ужо традыцыйна на выстаўцы можна ўбачыць работы Вольгі Мельнік, Алесі Скарабагатай, Ганны Конанавай. На суд гледачоў прадстаўляюць свае творы пераможцы рэспубліканскага конкурсу "Зорка ўзышла над Беларуссю” Паліна Корзун, Дзяніс Іваноў і інш. Фотаздымкі  Мікалая Купрыча на VI Адкрытых маладзёжных Дэльфійскіх гульнях краін-удзельніц СНД удастоены залатога медаля”.

Читать полностью: http://www.interfax.by/event/73663